Gin-athag sang hepe sang National Capital Region Police Office (NCRPO) nga indi overkill ang gindeploy nga 23mil ka mga kapulisan kag iban pa nga force multipliers para sa ikatlo nga State of the Nation Address (SONA) ni Pangulong Ferdinand Marcos Jr. sa adlaw sang Lunes, Hulyo 22.
Paathag ni NCRPO chief Maj. Gen Jose Melencio Nartatez Jr. nga yara sa kapin 2000 ka mga VIPs kaangay sang mga opisyal sang gobyerno kag diplomats ang yara sa House of Representatives para sa SONA samtang yara sa 8,000 ka mga tawo naman ang ginalauman nga magaupod sa mga rally sa gwa sang Batasang Pambansa.
Dugang pa sang NCRPO chief, nga ila man nga ginsiguro nga mangin seamless, matalunsay kag matawhay ang pagpatigayon sang SONA ni President Marcos.
Una na nga ginpahayag ni Nartatez, nga gindugangan pa sang 1000 ka personnel ang igadeploy agud siguruhon ang seguridad sa SONA gani ang kabug-usan nga numero sang kapulisan kag government security elements nga ideploy ang nagdangat na sa 23 mil.
Sa nasambit nga numero, 8000 law enforcers ang ipahamtang sa Commonwealth Avenue kag IBP road kun sa diin ginalauman nga magpatigayon sang rally ang pro-government kag mga militante nga grupo.
Nagpaathag ang police official matapos tawgon ni Bayan Secretary Mong Palatino nga overkill ang preparasyon sa deployment sang PNP.
Samtang, sa karun, nakaheightened alert na ang NCRPO samtang humalin subong nga adlaw, bisperas sang SONA, mangin full alert na ang mga kapulisan.
