Sa 355 nga nagdugang nga COVID-19 cases sa Western Visayas kahapon, 237 diri ang nagikan sa ciudad sang Bacolod samtang 48 naman ang nagikan sa probinsya sang Negros Occidental.
Sa Department of Health Region 6 COVID-19 case bulletin no. 162, nakarecord ang Western Visayas sang 355 ka dugang nga mga kaso nga ginalakipan sang 237 sa Bacolod City, 48 sa Negros Occidental, 40 sa Iloilo City, 15 sa Capiz, 11 sa Iloilo Province samtang tig-duha naman sa Antique kag Guimaras.
Sa 355 ka panibag-o nga kaso, 336 diri ang local cases, walo ang returning overseas Filiinos (ROF), tig-isa ang locally stranded individual (LSI) kag authorized person outside residence (APOR) samtang for verification naman ang nabilin nga siyam.
Sa karun, may ara na sang kabug-usan nga 5,701 ka mga kaso ang narecord sa Western Visayas nga may 2,752 ka mga aktibo nga kaso.
Samtang 2,862 naman ang mga nakarecover sa pagdugang sang 134 nga bag-o kag nagdangat naman sa 87 ang numero sang nagtaliwan sa pagdugang sang isa nga napatay gikan sa ciudad sang Bacolod.
Yara naman sa 71.37% ang asymptomatic sa kabug-usan nga kaso sang rehiyon.
Sa karun ang Bacolod City ang nakarecord na sang kabug-usan nga kaso nga nagdangat sa 1,723 samtang nagdangat naman ang kabug-usan nga kaso sa probinsya sa 1,411.
