Nagakaagnas na sang nasapwan ang bangkay sang isa ka babayi sa Purok 2, Barangay 1, Poblacion, Hinoba-an, Negros Occidental kahapon sang hapon, Abril 30.
Ginkilala ang biktima kay Talia Evangelista, 24 anyos, single, nagatrabaho nga kabulig sa balay kag residente sang Pulang Araw, Brgy. 2, Hinoba-an, Negros Occidental.
Sa interview sang Bombo Radyo Bacolod kay Police Major Jaynick Bermudez, hepe sang Hinoba-an Municipal Police Station, ang biktima ang ginkilala mismo sang iya pamilya pinaagi sa panapton, kun sa diin ini ang ginreport nga missing sang Lunes.
Suno kay Bermudez, ulihi nga nakita ang biktima sang Domingo sang gab-i, ulihi nga adlaw sang fiesta sa banwa.
Suno sa hepe, wala pa sang may nakapalapit sa police station nga ulihi nga nakaupod sang biktima.
Ginpost man sang pamilya sa social media nga missing ang biktima apang wala man sang may nagcomment nga ka-upod sini gani wala matumod kun sin-o ang ulihi sini nga nakaupod.
Nasapwan ang biktima sa bakante nga lote malapit sa motorpool sang banwa.
Ginalantaw sang mga police nga may foul play sa kamatayon sang biktima apang wala pa makagwa ang resulta sang autopsy report gani indi pa matumod ang rason sang kamatayon sini.
