Patay ang 24 anyos nga babayi matapos nga ginluthang sa atubang sang ila balay sa Purok Boulevard, Barangay 14, Bacolod City, kapin alas- 7:30 kagab-i.
Ang biktima ang ginkilala nga si alyas “Babes” Gonzales, anay nagatrabaho sa isa ka fastfood chain, may live-in partner kag miyembro sang LGBTQ community.
Sa interview sang Bombo Radyo kay Hecsor Gonzales, amay sang biktima, mabuot kag maayo nga klase sang tawo ang bata sini gani iya ginkakibot ang natabo.
Suno diri, nagabyahe ini sang tricycle sang siya ang gintawgan nga ginpatay ang iya bata.
Pagpauli sini, nakit-an na lamang sini nga nagahapa ang iya bata sa gwa sang ila balay kag wala na sang kabuhi.
Wala man ini sang may nahibaluan nga may nakontra ukon may nagapmahog sa biktima.
Tuman ang kasubo nga nabatyagan ni Hecsor bangod nga masami nga ang bata sini ang nagaserbe sang pagkaon sa iya kun siya ang nagapauli gikan sa byahe kag kun kaisa nagabaton pa ang bata sini sang labada para maka-income.
Nagapanawagan sa karun sang bulig ang pamilya para sa pagpalubong sa biktima.
