Arestado ang 24 anyos nga lalaki nga nanghurikap sa 14 anyos nga babayi nga iya ginapangaluyagan sa ciudad ang Bacolod.
Sa interview sang Bombo Radyo Bacolod kay Police Lt. Rowena Jean Magan, officer in charge sang Women and Children Protection Desk (WCPD) sang Bacolod City Police Office, sang Disyembre 31 wala nakapauli ang bata nga babayi samtang nagahilapit ang pagsug-alaw sang bag-ong tuig.
Siya ang nakita sa residence sang 24 anyos nga lalaki kag amo na nga nagpatawag sang pulis ang pamilya.
Suno kay Magan, ang biktima ang ginhikap sa upper extremities sang iya lawas apang ginpaidalum ini sa gihapon sa medico legal agud mahibaluan kun ano ang posible nga mapasaka nga kaso batok sa suspetsado.
Nahibaluan naman nga ang lalaki ang nagapangaluyag sa menor de edad kag ginahibalo pa kun paano sini nadala sa iya balay ang biktima.
Sa karun yara sa kustodiya sang Bacolod Police Station 3 ang lalaki samtang gina-asikaso na ang pagpasaka sang kaso batok sa iya.
