Nagapadayon ang ginapatigayon sang Commission on Elections nga Automated Counting Machines (ACM) road show sa mga eskwelahan sa ciudad sang Bacolod.
Sa interview sang Bombo Radyo Bacolod kay Bacolod Election Officer Atty. Revo Sorbito, nagapadayon ang ila nga pagpatigayon sang ACM road show sa mga eskwelahan sa ciudad sang Bacolod kun sa diin nakapatigayon na sila sa Carlos Hilado Memorial State University-Alijis campus.
Suno kay Sorbito, indi pa mapat-od kun ano ang madason nga eskwelahan bangud ginakumpirmar pa sang mga ini ang schedule kun san-o sa mga eskwelahan.
Samtang, nagapadayon naman ang ginapatigayon nga COMELEC checkpoint kasunod sang pag-umpisa sang election period para sa May 2025 midterm elections kag election gun ban.
Suno kay Sorbito, may isa sa ciudad sang Bacolod ang nabuena manohan matapos madakpan nga naglapas sa Comelec election gun ban.
Naaresto si Archie Aragon, 24 anyos, single, wala sang trabaho kag residente sang Purok Arseo, Barangay Mansilingan, Bacolod City.
Nadakpan si Aragon sa bahin sang Brgy 28, Bacolod City kun sa diin nakita ini nga may bitbit nga isa ka unit sang improvise firearm ukon Pogakhang nga loaded sang isa ka live ammunition sang 20 gauge shotgun.
Ginpahayag man ni Sorbito nga sa COMELEC checkpoint indi man kinahanglan nga may mag-upod gid nga personnel sang COMELEC sa mga kapulisan magluwas na lamang kung may mga kinahanglan nga i-update nga dapat ipatuman sa checkpoints.
Nagpahanumdom man ini sa tanan nga license gun holders nga suspended ang license to possess and carry firearms magluwas nalang kun may yara sang exemption nagikan sa COMELEC.
