Wala na sang kabuhi sang nasapwan ang 24 anyos nga lalaki matapos gin-alegar nga gin-abduct kag ginsulod sa puti nga van.
Ang abduction natabo sa Kabankalan City kun sa diin pilit nga ginsulod sa puti nga van si Kirt Lobaton, 24 anyos, residente sang Hacienda Manaol, Brgy. Matab-ang, Talisay City, kag ang abyan sini nga si Niko Fajardo, 24 anyos, residente sang Brgy. Villamonte, Bacolod City.
Halin sa Bacolod City ang duha kag mapadulong sa Kabankalan City apang pag-abot sa Kabankalan proper, may apat ka lalaki nga nag-abduct sa ila.
Gina-alegar nga gingapos ang ila mga kamot gamit ang cable tie.
Pag-abot sa Sitio Km. 113, Barangay Dancalan, sa banwa sang Ilog ginpapanaog sila nga duha kun sa diin ginluthang si Lobaton sa likod sang ulo nga nagresulta sang iya kamatayon samtang si Fajardo naman ginpadalagan kag gintiro apang wala maigo kag nakapalagyo.
Sa interview sang Bombo Radyo kay Police Major Randy Babor, hepe sang Ilog Municipal Police Station, nagpahayag si Fajardo nga magpakaisa sila ni Lobaton apang sang ulihi naghambal naman ini nga mag-abyan lang sila nga duha.
Suno diri, padayon pa ang imbestigasyon sa natabo nga pagpang-abduct sa duha.
