Ginpasalig sang Executive Director sa Bacolod City Emergency Operations Center (EOC) nga sumugod sa Lunes, mangin 24 oras na ang vaccination drive sa syudad.
Apisar nga nagasarado ang mga mall kun sa diin ginagamit man nga vaccination sites, ginpasalig si Bacolod City Administrator Em Ang, nga may-ara sang alternatibo nga mahemo padulongan.
Paathag ni Ang nga sarang makapadulong sa Jollibee Gatuslao bangod magapatigayon sang COVID-19 vaccination sa 2nd floor sang fast food chain humalin alas-8:00 sang gab-i tubtob alas-8:00 sang aga.
Pasalig man sini nga magacater man ang mga ini sang nagkalain-lain nga bakuna kasubong man sang mga magapatublok sang 2nd dose.
Dugang pa sini nga wala na sang mairasun ang mga pumuluyo nga indi makapabakuna bangod bisan ang mga bedridden ang ginapadulong sang vaccination team para sa home service.
May-ara man sang Vaccination Taxi ukon VAX-i kun sa diin ginapadulongan sang bus ang mga merkado kasubong man ang mga public utility vehicle drivers agud mabakunahan.
Isa man sa mga ginacater sa mga vaccination sa malls ang mga Business Process Outsourcing (BPO) employees nga indi makadtuan para sa onsite vaccination.
Masami nga indi man ang mga ini maka-absent bangod wala sang income sa nasambit nga adlaw kun indi makatrabaho, ilabi na ang mga bread winner.
Bangod sa mga programa, nagapati si Ang nga nagapakita na ini nga malapit na malab-ot ang herd immunity.
Ginalauman naman sini nga mabakunahan ang mayorya sang populasyon sa Bacolod sa masunod nga mga binulan.
