24 ka dugang nga mga healthcare professionals ang ginbakunahan sa ikaduha nga rollout sang Sinovac vaccines sa Bacolod City Government Center kahapon, Marso 7.
Suno kay Emergency Operation Center (EOC) deputy for medical Dr. Chris Sorongon, luyag nila nga magpalab-ot sang mensahe sa kumunidad nga ang mga doktor nga nagaatipan sa ikaayong lawas ang nagapasalig nga safe ang bakuna kag ginakinahanglan nga mag-avail ang kada-isa.
Ini ang ginpahayag ni Sorongon sa rollout nga gin-organisa sang COVID-19 Vaccination Council (CoVaC) sang ciudad.
Kabahin man sa nabakunahan ang Psychiatrist nga si Dr. Jocelyn Gayares kag Dr. Raymond Wong, nga medical consultants sa Riverside Medical Center Inc. (RMCI).
Ang mga nakabatun sang vaccine shot ang ginmonitor naman sa sulod sang 30 ka minutos.
Nagpahayag naman si Dr. Gayares nga wala ini sang nabatyagan nga adverse effect matapos sang pagbakuna.
Ang inisyal nga doses nga nabatun sang mga medical professionals ang kabahin sa kapin 6,300 nga CoronaVac vials nga ginhemu sang Sinovac nga gin-alukar sang Department of Health (DOH) sa duha ka ospital sa ciudad sang Bacolod.
Suno kay Sorongon, ang alukasyon sang bakuna ang maka-cater sa 3,150 ka mga healthcare workers sa Ciudad.
Suno kay Bacolod City Mayor Evelio “Bing” Leonardia, nga mapalarun ang Bacolod nga nagahatag sang pagsuporta ang mga medical professionals sa vaccination program sang ciudad.
Sang Biyernes, Marso 5, ang ciudad ang nagpatigayon sang una nga rollout sang Sinovac vaccines sa BCGC lobby kun sa diin lima ka mga medical doctors kag isa ka nurse ang ginbakunahan.
