31 tanan ka mga balay ang nasunog sa Zone 8, Sitio Dacutan Dako, Barangay Mambulac, Silay City, Negros Occidental pasado ala-1:00 ang takna kaina sang kaagahon.
Sa interview sang Bombo Radyo Bacolod kay Fire Senior Inspector Jovelyn Zamar, fire marshal sang Silay City Fire Station, sa inisyal nga impormasyon, 24 ka mga balay ang totally-burned samtang pito ang partially-burned.
Suno kay Zamar, nabaton nila ang fire call ala-1:59 ang takna kaina sang kaagahon kag nag-abot sila sa area sang sunog alas-2:04 ang takna sang kaagahon.
Suno sa fire marshal, nagdangat sa third alarm ang sunog kun sa diin nagresponde ang katapo sang Talisay City Fire Station kag E.B Magalona Municipal Fire Station kasubong man ang Bacolod City Fire Station.
Nagpanindugan man ini nga indi matuod ang alegasyon sang mga pumuluyo nga naulihi sa pagresponde ang mga bombero sang ciudad sang Silay bangud ang nakita lamang sang mga pumuluyo amo ang nagbalik nga fire truck nga nagpa-refill sang tubig.
Aminado man ini nga naatrasar man sila sa pagsulod bangud tuman ka kitid ang dalan kag ang kalayo ang nag-umpisa sa sulod pa sang eskinita.
Dugang pa ni Zamar, bastante sa fuel ukon gatong ang fire truck nga nagresponde sa sunog kag indi matuod ang alegasyon nga nawad-an sila sang gatong kag indi husto ang interpretasyon sang mga ini sa pagtawag niya kag mahimo nabatian sang mga pumuluyo nga mahatagan sang fuel ang Talisay City Fire Station kag E.B Magalona Municipal Fire Station kasubong man ang Bacolod City Fire Station, nga nag-upod sa ila sa pagresponde agud mapalong ang kalayo.
Samtang ginpasalamatan kag ginakalipay sini ang ginhimo sang katapo sang Mambulac Community Fire Auxilliary Group nga nagpatigayon sang bucket brigade agud nga magbulig sa pagpalong sang kalayo.
Nagpanugyan man ini sa tanan nga maghalong, tsekyaron ang mga linya sang kuryente kag indi pagpasugtan ang mga bata nga maghampang sang posporo ukon mga bagay nga makatuga sang kalayo agud malikawan ang sunog.
