Nakatapos na sang mandatory 14-day quarantine sa isa ka hotel sa ciudad sang Bacolod ang 24 ka mga Negrense overseas Filipino workers.
Sa interview sang Bombo Radyo Bacolod kay Dr. Zeaphard Gerhart Caelian, pinuno sang Humanitarian Cluster sang probinsya, lunsay negatibo sa coronavirus disease 2019 ang mga ini.
Ginsugat sila sang ila tagsa ka mga local government units nga natungdan agud idul-ong sa ila mga panimalay.
Madumduman nga ang ini nga batch ang ginabug-usan sang 27 ka mga OFWs nga nag-abot sa Negros Occidental sang Abril 28 nagikan sa Manila.
Tatlo sa mga ini ang nagpositibo sa COVID-19 kag padayon karon nga naka-quarantine sa Provincial Healing Center sa EB Magalona.
Suno kay Caelian, gilayon nga gindisinfect ang hotel agud nga gamiton naman sang maabot pa gid nga mga OFW.
