24 ka mga miyembro sang New People’s Army ang nagsungka sa 62nd Infantry Battalion sang Philippine Army kahapon.
Sa interview sang Bombo Radyo kay 62nd IB Commander Lt. Col. Melvin Flores, ginpahayag sini nga duha ka mga miyembro sang makawala nga grupo ang una nga nagsungka kag ginsundan ini sang pila pa gid ka mga miyembro gani kabug-usan nga 24 ang ila nga naprofile.
Suno kay Flores, ang kakapoy, gutom kag indi insakto nga mga ginapahimo sa ila ang rason kun ngaa nagdesisyon ang mga ini nga magbalik sa sabak sang gobyerno.
Isa man sa nagmotivate sa mga ini nga bayaan ang pagakarebelde ang Enhanced Comprehensive Local Integration Program (E-CLIP) nga programa sa gobyerno.
Suno sa iya, nakit-an sang mga ini ang sinceridad sang gobyerno sa pagbulig sa ila nga magpanugod sang bag-o nga kabuhi.
Nahibaluan man nga makabaton ang tagsa-tagsa ka mga anay rebelde sang P10,000 nga balor sang negosyo kit.
Sa karun, suno sa pinuno, lima na ka mga armas ang nasurrender sa tropa nga ginalakipan sang isa ka m16 riffle; duha ka .45 calibre pistol; kag duha ka .38 calibre pistol.
