Nangin madinalag-on ang pagpatigayon sang 24 oras nga operasyon sang Police Regional Office – Negros Island Region sa Simultaneous Anti-Criminality Law Enforcement Operations (SACLEO).
Sa interview sang Bombo Radyo Bacolod kay Police Lt. Col. Joem Malong, Public Information Officer sang Police Regional Office sang Negros Island Region, ang operasyon nag-umpisa alas-6:00 sang aga sang Agosto 6 tubtob alas-5:59 sang kaagahon sang Agosto 7.
Sa illegal drugs may yara sang napatigayon nga 11 ka operasyon kun sa diin nadakpan ang 12 ka suspek kag nakumpiskar ang 239.525 grams sang suspected shabu nga may estimated value nga P1,628,770.
Sa illegal gambling, may 4 ka operasyon nga ginpatigayon kun sa diin 11 ang nadakpan kag nakumpiskar ang P1,281 nga bet money.
Sa loose firearms naman may nakumpiskar nga isa ka explosive device kag may isa nga ginsurrender nga armas-luthang.
Sa wanted persons, may yara sang 42 nga naaresto; 13 sa provincial level, 4 sa city ukon municipality level kag 25 ka other wanted persons.
Sa bahin naman sang pagbayolar sa local ordinances sa 351 ka operasyon nga ginpatigayon, may yara sang 670 ka mga violators, 279 ang ginmultahan, kag 391 ang gin-warningan.
Samtang, nangin madinalag-on naman ang pagpatigayon sang Simultaneous Anti-Criminality Law Enforcement Operations (SACLEO) kun sa diin hugot nga gina-monitor ang mga operasyon paagi sa body worn cameras sa pagsiguro sa lehitimo kag may transparency nga mga operasyon.
Suno kay Malong, ini tanan resulta sang joint effort sang intelligence operation kag mabakod nga koordinasyon sang komunidad.
