BACOLOD CITY — Padayon sa gihapon nga mabatyagan ang epekto sang importasyon sang high fructose corn syrup nga amo ang ginagamit sang softdrink companies sa presyo sang kalamay nga gina-produce sang Negros Occidental.
Suno kay Atty. Dino Yulo, spokesperson sang Sugar Alliance of the Philippines – Negros Occidental, nagnubo na gid ang presyo sang kalamay sa probinsya.
Depende sa central nga ginapagalingan, ang presyo sang sako sang kalamay ang nagabili 1, 220 tubtub 1, 240 pesos.
Sang wala pa ang HFCS suno kay Yulo, nagaayo na ang presyo sang kalamay sa bulan sang Mayo apang sa karun, nagapanaog ini nga nagapanaog.
Bangud sini, nagabatyag sang pagkaputo ang magagmay nga mga sugar planters.
Nahibaluan nga sa karun, madamo ang mga small planters nga naatrasar ang ila pagpagaling bangud sa kakulang sang manugtapas sang tubo.
Ang mayor nga rason nga ginalantaw diri suno sa SAP amo ang importasyon sang HFCS bangud wala sang oversupply sang kalamay sa Negros Occidental kag wala man nagnubo ang demand.
