Arestado ang isa ka 25-anyos nga Muslim matapos makuhaan sang kapin P6 million nga balor sang suspected shabu sa buy-bust operation nga ginpatigayon sang Bacolod City Police Office City Drug Enforcement Unit sa Purok Fatima, Islamic Center, Brgy 31, Bacolod City alas-12:00 kahapon sang udto.
Ginkilala ang subject person nga si Abdul Jalil Macaulang, alyas “Jak”, lalaki, wala sang trabaho nga residente sang nasambit nga lugar.
Ang narecover nga illegal nga druga ang ginabanta nagabug-at sang 1000 grams nga may standard drug price nga P6,800,000.
Sa interview sang Bombo Radyo kay PLt Col Roberto Indiape Jr., Chief sang Bacolod City Police Office City Drug Enforcement Unit and Intellegence Unit, si Macaulang ang newly identified kag ginakabig nga high value individual bangud sa kadakuon sang ilegal nga druga nga narecover sa iya.
Suno diri, ang subject person ang madugay na sa area kag nagabaligya sang mga ginabagsak sa iya nga ilegal nga druga.
Dugang pa, madamo sang mga naga-reklamo nga mga pumuluyo sa lugar bangud sa kahangawa nga sila ang madalahig sa mga drug personalities sa lugar.
Pahayag ni Indiape, indi pa matumod kun diin halin ang ang source sang gina-alegar illegal drugs apang ini ang gwa na sa Negros.
Ang suspect ang nakahunong sa karun sa Bacolod Police Station 6.
