Ginkompirmar sang punong barangay sang Barangay Singcang-Airport, Bacolod City nga 25 ka mga balay kag 30 ka pamilya ang apektado sang seal-off sa isa ka purok matapos magpositibo sa coronavirus ang isa ka residente.
Sa interview sang Bombo Radyo Bacolod kay Punong Barangay Rosinie Distrito, ginpahayag sini nga ang Sitio Magsungay, Purok 3, Barangay Singcang-Airport ang ginlockdown matapos nga nagpositibo ang empleyado sang syudad kag isa ka residente sang Barangay Singcang-Airport kag nakaclose contact man sa pasyente nga empleyado man sang syudad nga nauna na nga nagpositibo.
Ginkompirmar man ni Distrito nga sang paggwa sang swab test result sang Sabado sang gab-i, ginkuha sang City Health Office (CHO) ang pasyente pagkaaga agud dal-on sa quarantine facility.
Sang Sabado, ginlockdown man gilayon ang nasambit nga purok.
May yara sang nagabantay nga police kag mga volunteers sa sulod sang 24 oras agud masiguro nga wala sang nagagwa.
May yara naman sang foodpacks nga ginhatag si Bacolod City Lone District Congressman Greg Gasataya kag kasubong man ang barangay sang foodpacks kag vitamins bilang ayuda sa mga apektado nga residente.
Ginpahayag man sini nga kapin 15 kabilog kalakip na ang pamilya sini ang igapaidalom sa swab test bangud may close contact sa pasyente.
Suno pa kay Distrito, may ginbatyag na ang pasyente antes pa man ini ginswab apang maayo naman ang pamatyag sini sang gindala sa quarantine facility.
Wala naman sang nangin problema sa contact tracing kag pagseal-off sa lugar bangud nagapamati kag nagapati ang mga pumuluyo sang abiso sang punong barangay.
