25 ka mga Persons Deprived of Liberty gikan sa Bureau of Jail Management and Penology – Handumanan ang mahatagan sang tyansa nga maka-eskwela sa kolehiyo.
Sa interview sang Bombo Radyo Bacolod kay Jail Superintendent Abner Zamora, chief operation division sang BJMP Regional Office 6 kag anay jail warden sang Metro Bacolod District Jail male dormitory annex, halos isa ka tuig nila nga gintinguhaan nga makapangita sang eskwelahan nga maka-offer sang college education sa mga PDLs.
Sila ang nagpangayo sang bulig sa Bacolod City College, bangod ini ang yara sa idalom sang Bacolod City Government agud matigayon ang “College Behind Bars”, pinaagi kay College Administrator Dr. Ma. Johanna Ann Bayoneta.
Suno kay Zamora, sa ila nga kasugtanan, ang college instructor amo ang magapadulong sa BJMP-Handumanan apang sa karun 25 lamang ka PDL ang malakip sa programa.
Samtang Bachelor of Science in Entrepreneurship naman ang gina-offer nga kurso.
May-ara man sang requirements sa sarang maka-avail sang programa kun sa diin sila ang dapat graduate sa senior high school ukon undergraduate sa kolehiyo agud mas mahapos na lamang ang pagproseso sang dokumento.
Paathag ni Zamora nga mga wala pa na sentensyahan lamang ang makasulod sa programa kag hinali nga madismiss ang kaso kag sila ang makagwa, ginpasalig man sang BCC nga sarang nila mapadayun ang kurso sa paggwa.
Pasalig sini nga wala ginakapoy ang BJMP sa pagpangita sang alternatibo nga mga programa agud nga indi mauyang ang panahon sang mga PDL samtang yara sa pasilidad kag mangin produktibo sa ila nag pagbalik sa sosyodad.
