Ginkumpirmar ni Bacolod City Administrator Em nga sa 1,665 ka mga market vendors nga ginpaidalum sa RT-PCR test sang tinalikdan nga Sabado, 25 ukon 1.5% diri ang nagpositibo sa virus.
Sa interview sang Bombo Radyo kay Ang, nagapakita ang manubo nga positivity rate sang ginpatigayon nga swab test sa mga vendors sang tatlo ka mayor nga merkado sa Bacolod City nga nangin madinalag-on ang Emergency Operation Center (EOC) sa ila ginahimo nga pagpakigbato sa COVID-19.
Suno sa iya, nagapakita man ini nga epektibo ang mga health protocols nga ginapatuman sang market supervisors sa mga merkado kag ila na lang ini nga ginamaintain.
Suno diri, magluwas sa pagsuksok sang face mask kag faceshield, nag-install man sila sang mga handwashing stations, hugot nga ginamonitor ang pagpatuman sang physical distancing kag gina-impose naman ang one entrance, one exit policy.
Tuhoy naman sang 25 ka mga vendors nga nagpositibo sa virus, sun okay Ang, igabutang ang mga ini sa isolation facilities kag magapatigayon sang contact tracing sa ila mga nakaclose contact.
Suno sa iya, kun may yara sang himata ang mga vendors nga indi infected sang virus, sarang sila nga makabulos baligya samtang nakaisolate ang vendor.
Ginkumpirmar man sang city administrator nga may kapin 300 ka mga market vendors nga wala nagpakigbahin sa swab test sang Oktubre 10, ang nagpaswab kahapon matapos makit-an nga indi ini sakit kag kun ano ang matabo kun magpositibo sila.
Ginpasalamatan man sini si General Melquiades Feliciano, ang Inter-Agency Task Force Deputy Implementer sa Visayas sa bulig sini sa ciudad.
Suno kay Ang, wala pa man sang exact nga petsa kun san-o mahalin sa Bacolod si Feliciano bangud ginabutang pa sini sa lugar ang iban pa nga sistema sang ciudad sa pagtapna sang coronavirus.
