Kanselado ang byahe sang tanan nga barko nga manubo sa 250 gross tonnage ang capacity sa mga pier sa Negros Occidental apisar nga wala sang Storm Warning Signal.
Sa interview sang Bombo Radyo Bacolod kay Commander Jansen Benjamin, commander sang Philippine Coast Guard – Northern Negros Occidental, may gale warning nga gindagdag sa Western Visayas gani ginkanselar ang byahe sang manubo sa 250 gross tonnage capacity nga barko.
Ini ang ginapatuman sa Guimaras – Pulupandan vice versa, Sagay – Bantayan vice versa, Cadiz – Bantayan vice versa, San Carlos – Toledo vice versa.
Samtang ang Fastcraft M7 nga barko sa San Carlos port ang nag-anunsyar naman sang kanselasyon sang byahe.
Apang padayun lamang ang byahe sang mga barko nga mataas sa 250 gross tonnage ang capacity bangod wala man sang storm warning signal sa Visayas.
Sa pihak nga bahin, bangod napaidalum sa Tropical Cyclone Wind Signal No. 1 ang pila ka bahin sang Manila, automatic naman nga suspendido ang byahe sang barko Manila-Bacolod vice versa.
Paathag sini nga yara sa ila protocol nga kun may mapaidalom sa Storm Warning Signal, sa origin port man ukon destination port, automatic na nga suspendido ang tanan nga byahe, sa bisan ano nga gross tonnage capacity sang barko.
Nagpanawagan naman si Benjamin sa mga nagalayag nga likawan anay ang magpalawod bangod tuman ka delikado sang dagat.
Suno diri, may tion nga kalmado ang dagat apang hinali nalang nga nagabaskog ang pugada.
Ginapakamaayo sini nga wala sang major maritime incident sa ila area of responsibility luwas lamang sa nagkulob nga motor banca sang Domingo nga gilayon man nga narespondihan.
