Kapin 250 ka indibidwal kalakip ang Rohingya refugees kag Bangladeshi national, ang ginapatihan ginbawian sang kabuhi ukon missing matapos nagkulob ang baruto nga ila ginasakyan sa bahin sang Andaman Sea nga padulong kuntani sa Malaysia, suno sa U.N. refugee kag migration agencies.
Ginpahayag ni Lieutenant Commander Sabbir Alam Suzan sang Bangladesh Coast Guard sang Abril 9 nga naluwas ang siyam ka persona, lakip ang tatlo ka Rohingya, kag anum ka Bangladeshi.
Suno kay Suzan, ang Bangladesh flag carrier nga M.T. Meghna Pride ang nakasapo kag nagrescue sa siyam ka tawo matapos makit-an sang mga tripulante ang mga survivors nga nagalutaw-lutaw sa dagat.
Ginpahayag sang United Nations High Commissioner for Refugees (UNHCR), kag sang International Organization for Migration (IOM) sa isa ka joint statement, ang trawler ang gikan sa Teknaf sa bahin sang southern Bangladeshi district sakay ang madamo nga pasahero padulong sa Malaysia.
