Gin-abi-abi sang 3rd Infantry Division sang Philippine Army ang 254 ka mga bag-o nga suldado sa ginpatigayon nga graduation ceremony sang Candidate Soldier Class 606 kag Class 607-2019 sang nagligad nga Nobyembre 15 sa Camp Macario Peralta sa Capiz.
Sa interview sang Bombo Radyo Bacolod kay 303rd Infantry Brigade commander Brigadier General Benedict Arevalo, ginpahayag sini nga wala pa nahibaluan kun pila ka bilog ang ipadala nga mga bag-o nga suldado sa Negros Occidental.
Apang, sigurado siya nga may yara gid sang nakatalana para sa probinsiya.
Dugang pa ni Arevalo, madamo sang mga Negrense nga nag-gradwar man.
Nagapati man ang 303rd IB commander nga madamo gid ang mabulig sang mga bag-o nga suldado sa anti-insurgency campaign sang Philippine Army subong man sa iban pa nga mga programa.
Nahibaluan nga ginpangunahan sang bag-o nga commander sang 3rd ID nga si Brigadier General Eric Vinoya ang graduation ceremony sang mga suldado nga may yara na sang ranggo nga Private First Class matapos nila makumpleto ang tatlo ka bulan nga training.
Madumduman nga si Vinoya ang nagbulos kay Major General Dinoh Dolina matapos ini magretiro sang nagligad nga Nobyembre 12.
