Patay ang isa 26 anyos nga lalaki nga may intellectual disability matapos nga gin-alegar gintiro sang gwardiya sa dalan Lacson, malapit sa Carmelites, Barangay Mandalagan, Bacolod City.
Ginkilala ang biktima kay Roniel Sicapore, 26 anyos, residente sang Purok Tonggoy, Barangay Mandalagan.
Sa interview sang Bombo Radyo Bacolod sa iloy sang biktima, ang iya anak ang isa ka PWD kag may yara ini sang identification card sang intellectual disability.
Suno sa iloy ang iya bata ang wala man nagapanakit kag wala man ini nagapangawat.
Ginpahayag man nga kun magutom ang biktima, nagakuha ang biktima sang mga baligya kun sa diin ginabayran man gilayon sang mga ini.
Suno sa iloy sang ginbun-ag ang biktima may yara na ini sang deperensya.
Dugang pa sini nga masami nila sang iya bana ginasundan ang biktima kun ini ang magwa kag ginabayran lamang ang mga ginapangkuha sini.
Apang kahapon ginpangita nila kag sang ila nakita, wala na sang kabuhi ang ila bata.
Samtang, gin-alegar sang tag-iya sang tiyangge malapit kun sa diin nasapwan nga wala na sang kabuhi ang may deperensya sa paminsaron nga biktima nga antes pa gintiro nga nagpang ukay sa iya tiyangge kag naniklod sang bata ang biktima.
Suno sa tag-iya sang tiyangge nagpang-ukay ang biktima kag luyag man sini kuntani iassist apang ini ang nagapang-ukay na.
Gin-alegar man nga gintiklod pa sini ang mga bata sang tag-iya sang tiyangge.
Nagsulod man ang tag-iya sang tiyangge sa ila ginarentahan nga balay agud ma-untat ang ginapahayag nga pagtiklod sang biktima sa mga bata.
Wala man ini sang nabatian nga lupok bangud yara na ini sa sulod sang ila nga balay
Samtang, ginpahayag naman sang amay sang biktima nga security guard ang nagtiro sa iya anak kag ini ang gina-alegar nga paryente sang tag-iya sang tiyangge.
Suno sa amay, ang service firearm sang security guard amo ang gingamit sini sa pagtiro-patay sa biktima.
Suno diri, at-large ang ginapahayag nga suspek kag ini ang padayon pa nga ginapangita sang mga kapulisan.
