Patay ang 26-anyos nga iloy matapos nga ginbuno sang iya live-in partner sang nagbaisay ang mga ini sa sulod mismo sang ila nga balay sa Hervias 2, Barangay Villamonte, ciudad sang Bacolod kagab-i.
Ginkilala ang biktima kay Mary Rose Tamonan, residente sang Cauayan, Negros Occidental samtang ang suspetsado ang ginkilala kay Lyndon Dinawanao, 36 anyos kag residente sang Purok Hervias Dos, Barangay Villamonte Bacolod City.
Sa interview sang Bombo Radyo sa kay Alyas “Boy” care taker sang gina-arkilahan nga balay sang maglive-in, nakabugtaw na lang ini nga may yara sang nagluntad nga komosyon sa balay.
Suno kay Boy, ang lalaki ang nagatrabraho bilang job order sa Luis Hervias National High School samtang ang babayi ang nagatrabaho sa 888 mall sa syudad kag may anak man sila apang ara sa pamilya sang babayi.
Wala nakahibalo si Boy kun ano ang rason nga ginpatay sang suspek ang biktima bangud ginpahibalo lang ini sang tupad balay sang maglive-in natuhoy sa natabo bangud may nagasinggit.
Suno diri, kadali lang man nga pagbinaisay nga nagluntad sa tunga sang maglive-in.
Ginalantaw sang caretaker nga ginsakit sang lalaki ang babayi bangud pagbukas nila sa balay, patay na ang babayi.
May pilas man ang lalaki sa tiyan kag gindala sa ospital.
Isa pa lang ka bulan nga nagaboard sa lugar ang maglive-in.
Ginpahayag sang kaingod balay sang maglive-in partner nga antes ang pagpatay ni Lyndon Dinawanao sa iya live-in partner, nagab-ihan pauli si Mary Ann Tamonan kag nagpanuktok agud mabuksan sang lalaki apang nadugayan antes mabuksan.
Suno kay Eric Mansueto, ginpamangkot ni Dinawanao ang babayi kun ngaa nagpauli pa ini kag didto nag-umpisa ang paglalisay.
Suno kay Mansueto, mahinay ang tingog ni Dinawanao apang nagataas naman ang tingog ni Tamonan.
Gindumdom man sini nga nagadinumugay lang ang duha bangud sa gahod nga nabatian kag wala sila nagdumdom nga ginbuno na sang suspek ang biktima.
Suno kay Mansueto, nakaagi man nga nagbinaisay ang duha apang wala man ini nagadugay.
Wala man sila sang nabatian nga indikasyon nga patyon sang suspek si Tamonan.
Wala sang nakasulod sa balay agud tsekyaron ang duha bangud nakalock ini apang sang ginlingling, diri na nakita nga duguon na ang babayi.
Wala pa man natumod ang kutsilyo nga gingamit sa pagbuno sa biktima.
Suno sa utod ni Lyndon nga si Ronald Dinawanao, indi palahambal nga sahi sang tawo ang iya manghod.
Suno kay Ronald, ginpahibalo lang siya sang iya nga kumare sang natabo sa utod sini kag live-in partner.
Aminado si Ronald nga hipuson si Lyndon kag wala gid sang ginahambal nga may yara sila sang problema ni Tamonan.
Ginalantaw nga problema pinansyal kag pagpangimon ang masami nga ginaawayan sang biktima kag suspetsado.
