26 ka mga barangay sa probinsya sang Negros Occidental ang hilway na sa presensya sang New People’s Army kag natalana nga magbaton sang P20 milyones pesos nga balor sang proyekto nagikan sa National Task Force to End Local Communist Armed Conflict (NTF-ELCAC).
Ang NTF-ELCAC ang nakabaton sang P19 bilyones nga pondo sa idalom sang 2021 national budget.
Sa idalom sang amo nga alokasyon, kabug-usan nga 822 ka mga barangay sa bilog nga pungsod ang makabaton sang P20 milyones nga development assistance kada isa.
Suno kay National Security Adviser Hermogenes Esperon, ang 822 ka mga barangay nga sadto impluwensyado sang NPA ang naclear halin sang tuig 2016 tubtub 2019.
Ang proyekto nga mapilian sang barangay officials ang ginalakipan sang farm-to-market roads, classrooms, electricity, health station, water system kag irigasyon.
Suno kay Esperon, may circular na ang Department of Budget and Management tuhoy sa pagrelease sang pondo kag magasumiter ang Department of the Interior and Local Government sang requirements sa mas madali nga panahon.
Sa interview sang Bombo Radyo kay 3rd Infantry Division spokesperson Major Cenon Pancito III, 74 ka mga barangay sa Western Visayas ang hilway na sa presensya sang NPA kag 26 diri ang yara sa Negros Occidental.
Ini ang ginalakipan sang Barangay Banago, Bacolod City; Caduhaan, Cadiz; Canlusong, EB Magalona; kag Alimango, Binaguiohan, Buenavista, Dian-ay, Japitan, Langub, Libertad, Mabini, Malasibog, Paitan, Pinapugasan, Rizal, Udtongan kag Washington, Escalante City.
NPA free naman ang Barangay Carabalan, Himamaylan City; San Pablo, Manapla; Buluangan, Codcod, Guadalupe, Nataban kag Quezon, San Carlos City; kag Barangay Estado kag Gawahon, Victorias City.
Suno kay Pancito, ginatukib sang gobyerno ang problema sang mga pumuluyo sa social services agud nga ini ang masolusyunan kag maaguman ang barangay development.
