26 ka mga balay ang totally-burned kag tatlo ang partially-burned sa sunog nga nagluntad sa Purok Magnolia, Barangay 7, ciudad sang Bacolod kagab-i.
Suno kay Fire Chief Insp. Stephen Jardeleza, fire marshal sang Bacolod City Fire Station, nabaton nila ang fire call alas-11:09 sang gab-i.
Pila naman ka minutos ang nauyang antes nakaabot sa fire scene bangud sa sanga sang kahoy sa 15th Street kag mga salakyan nga nagapark sa higad sang dalan gani nakaabot sila sa fire scene alas-11:14 sang gab-i.
May nagsulod naman nga fire truck sa 13th kag 14th Street.
Ginpasaka sang Bacolod City Fire Station sa 3rd alarm ang sunog kun sa diin gingamit ang tanan nga fire trucks sa mga sub-stations kag nagbulig man ang Amity Fire Brigade kag Chamber Fire Brigade.
Gindeklarar nga under control ang sunog alas-12:21 kag nafire out ang sunog ala-1:36 sang kaagahon.
Sa initial investigation, nagsugod ang sunog sa balay ni Richard Benjamin apang indi pa matumod kun ano ang gintunaan sini.
Suno kay Barangay Kagawad Bernabe Sibug, 29 ka mga balay ang nasunog kun sa diin magluwas sa 26 ka mga balay nga totally-burned kag tatlo nga partially-burned, may lima ngaa sharer 32 nga renter.
Mas madamo naman nga apektado ang mga boarders gani nagatinir sila sa karon sa ABES II.
Kaina sang aga, ginsaylo na sa ABES II ang tanan nga mga fire survivors kun sa diin ang barangay officials na mismo ang naghanda sang ila pagkaon.
Nagpasalig naman ang mga opisyales sang Barangay 7 nga hatagan nila sang bulig ang mga residente nga nakasurvive sa sunog.
Suno diri, hatagan sang pagkaon ang mga pumuluyo kada adlaw tubtub nga makakita sila sang maistaran ukon makabalik sa ila ginhalinan.
Nagbalik naman sa lugar ang iban nga mga lalaki agud nga magtipon sang sarang pa nila mapuslan para sa ila balay.
Nag-apela naman ini sa mga Bacolodnon nga sarang makadonar sang galamiton sa balay kag bayo sang mga nasunugan.
Kaina sang udto, nag-abot na ang bulig para sa mga nasunugan kag ini ang ginpahamtang sa Day Care Center.
Suno kay Punong Barangay Hershey Sibug, siguruhon nila nga mahatagan sang ayuda ang kada pamilya.
Ini ang ginalakipan sang food packs, hygiene kits, folding beds kag mga ulunan.
Tumuron naman kun pila gid ang apektado nga pamilya bangud ang iban diri ang yara sa ila mga himata.
Hingyunon naman ang mga residente nga magpreparar sang mga papeles agud nga maka-avail sang financial assistance nagikan sa Department of Social Services and Development.
