Wala na sang kabuhi sang nasapwan ang gina-alegar nga may deperensya sa paminsaron sa Purok Bayanihan, Barangay Punta Taytay, ciudad sang Bacolod pasado alas 4:00 ang takna, kahapon, Setyembre 18.
Ginkilala ang biktima kay Jeric Pateño, 27 anyos kag residente sang Purok Kapawa sa nasambit nga Barangay.
Sa interview sang Bombo Radyo Bacolod kay Benmar Yanson, residente sa lugar, kahapon may isa ka residente nga nakakita sang bangkay kag ila ginkadtuan agud lantawon kun sin-o.
Ini bangud may isa ka wala nakapauli sa ila nga balay mga duha na kaadlaw.
Suno kay Benmar, ang nakakita sang bangkay sang biktima amo si alyas Enteng nga makuha kuntani sang hilamon sa lugar.
Suno diri, mahimo nga nakuryente ang biktima nga makuha kuntani sang lahin sang niyog sa lugar agud nga ibaligya.
Ang nasambit nga lugar ang may yara sang mainline sang kuryente kag makapila man sila magreport bangud sa nagluntad nga brownout sa lugar.
Nagapati ang pamilya nga wala sang foul play nga natabo sa amo nga insidente amo nga wala na sila nagpahanugot nga patigayunan sang imbestigasyon ang SOCO.
