Patay ang isa ka 27-anyos nga lalaki matapos gintiro sa Purok Adarna, Barangay 16, Bacolod City kaina sang udto.
Ginkilala ang biktima kay Mark Christian John Lucenio alyas Badjao kag tumandok sang Barangay 35 apang nagakadto sa Purok Adarna bangud diri nagapuyo ang ikaduha niya nga misis.
Nagapungko si Lucenio sa passenger seat sang tricycle sang ini ang gintiro nga nagresulta sa iya gilayon nga kamatayon.
Suno sa pila ka mga residente sa lugar, nabatian nila ang lupok kag sa ila nga paggwa, nagadunglay na ang biktima sa sidecar sang tricycle.
Sa interview sang Bombo Radyo sa iloy ni Lucenio nga si Angela, residente sila sang Barangay 35 apang sa Barangay 16 nakapangasawa si Lucenio gani masami ini sa lugar.
Suno sa iloy, wala nakapanugid ang iya bata nga may yara ini sang kontra.
Indi naman si Christian ang nagapanag-iya sang tricycle kundi nagpungko lang ini sa kun diin siya gintiro.
Indi sigurado si Nanay Angela kun nagagamit sang illegal nga druga ang iya bata apang nakaagi na ini priso bangud sa kaso nga robbery.
Suno sa iloy, kuntani konsensyahon ang nagtiro sa iya nga bata.
Indi naman kilala sang mga residente sa lugar kun sin-o ang nagapanag-iya sang tricycle.
