Pilason ang 27-anyos nga lalaki matapos nga ginluthang sang wala pa makilal-an nga suspetsado sa Sitio Mahayahay, Barangay Punao, San Carlos City, Negros Occidental sang Marso 14 sang gab-i.
Sa impormasyon nga nakuha sang Bombo Radyo, ginkilala ang biktima kay Allan Villadar, 27-anyos, residente sang nasambit nga lugar.
Sa inisyal nga imbestigasyon, si Villadar ang nagapanghakot sang panggatong sang ginbanggaan ini sang wala pa makilal-an nga suspetsado kag ginluthang sang wala man mahibaluan nga calibre sang armas luthang.
Siya ang naigo sa nawala sini nga paa kag nakaangkon sang tatlo ka mga gunshot wounds.
Gilayon naman nga nagpalagyo sa wala mahibaluan nga direksyon ang suspetsado.
Gin-admit ang biktima sa San Carlos City Hospital para sa nagakaigo nga pagbulong samtang padayon pa nga ginapangita ang suspect.
