Ginkumpiskar sang Task Force Botagoy sang ciudad sang Bacolod ang 27 kilos nga karne sang baboy sa stalls sa satellite market nga nahamtang sa Barangay Sum-ag, syudad sang Bacolod.
Sa interview sang Bombo Radyo kay Bacolod City Legal Officer Atty. Romeo Carlos Ting Jr., nagpadulong ang mga ini sa Sum-ag sattellite market kasunod sang pagviral sang report nga P140 lang ang kada kilo sang baboy sa Sum-ag apang ang stall nga nagabaligya ang natabuan nga sirado.
Suno kay Ting, ang tupad sini nga stall ang ginpatigayunan sang surprise inspection kun sa diin ginkumpiskar sang mga ini ang karne matapos nga wala sang mapakita nga tatak ang baboy kag resibo nga nag-agi ini sa slaughterhouse.
Suno sa city legal officer, ang mga nakumpiskar nga karne ang ginbubuan sang gas, ginsunog kag ginlubong.
Nagpaandam ini sa mga meat vendors nga indi na magbaligya sang wala nag-agi sa slaughterhouse bangud pasakaan na sila sang kaso sang CLO sa masunod nga madakpan ang mga ini.
