Indi magnubo sa 27 ka tawo ang nalumos matapos nga nagkulob ang MV Barima ferry sa kadagatan sang Guyana, samtang 83 pa ang nagapabilin nga missing.
Suno kay Prime Minister Mark Phillips, 69 na ang na-rescue, kag nagapadayon ang search and rescue operations sang mga divers sa lugar kun sa diin naglugdang ang barko.
Nagalaum si Philips nga makakita pa sila sang survivors kag nag-umpisa naman ang imbestigasyon sa trahedya.
Ginpasiguro sini nga manabat ang sin-o man nga mapamatud-an nga nagpabaya.
Samtang, ginpahayag ni Public Works Minister Juan Edghill nga ginaalegar nagpositibo sa cannabis ang kapitan sang ferry kag ang isa ka crew member.
Suno sa opisyal, seryoso ang nasambit nga paglapas bangud hugot nga ginadumilihan ang pag-inom sang makahulubog nga ilimnon ukon paggamit sang ilegal nga droga samtang nagatrabaho.
Yara na sa kustodiya sang kapulisan ang kapitan kag pila ka mga crew sang barko.
Suno sa survivor nga si Elena Moonsammy, nagtakilid ang ferry matapos maigo sang dalagko nga balod kag madasig nga ginsulod sang tubig.
Nagbulig man ang French army sa rescue operation paagi sa pagpadala sang mga divers, doktor, kag mekaniko naggikan sa French Guiana.
