Gin-aresto ang isa ka 28-anyos nga babayi matapos magpakuno-kuno bilang isa ka 16-anyos nga estudyante kag nag-enroll sa isa ka buluthuan sa Bronx, New York gamit ang peke nga pangalan.
Ginkilala ang suspetsado nga si Kacy Claassen, nga magapangatubang sang mga kaso nga child endangerment, trespassing, kag criminal impersonation.
Santo sa imbestigasyon, sang tinalikdan nga bulan, nag-enroll si Claassen sa Westchester Square Academy gamit ang pangalan nga “Shamara Rashad,” nga ginbun-ag sang 2010 kag bag-o lamang nagsaylo sa New York naggikan Ohio kaupod ang iya nga utod.
Suno sa mga otoridad, nakasulod pa sa klase ang babayi sa sulod sang halos duha ka semana kag nahatagan pa sang school ID antes natukiban sang eskwelahan ang iya matuod-tuod nga identidad.
Naggwa sa imbestigasyon nga wala gintago ni Claassen ang iya mga social media account, sa diin maathag sa iya nga social media nga ang iya kaadlawan amo sa Hulyo 29, 1997.
May-ara man sang mga litrato nga nagapakita nga may yara na ini sang bata nga babayi, kag sa pila ka post, iya man ginsambit nga siya amo isa ka iloy.
Bangud diri, nag-umpisa na nga magduda ang mga opsiyal sang buluthuan kag liwat-liwat ini nga ginakompronta natuhoy sa iya indentidad.
Sa ulihi, gin-ako na ni Claassen ang tanan nga pagbinutig.
Suno sa iya, gin-abisohan siya sang iya nga abyan nga mag-enroll bilang menor de edad agud mangin kwalipikado sa mas madamo nga social assistance ukon ayuda gikan sa gobyerno.
