Dakop ang 28 anyos nga lalaki sa drug buybust operation nga ginpatigayon sa Purok Balinday, Barangay 2, Bacolod City alas-8:00 ang takna kagab-i.
Suno kay P/Capt Paul Vincent Pendon, station commander sa Bacolod Police Station 2, ang suspetsado ang ginkilala kay Melvin Emolaga alyas Tata, 28 anyos kag residente sa nasambit nga lugar.
Si Emolaga ang nadakop sang mga operatiba pinaagi sa bulig sang confidential informant.
Suno kay Pendon, masobra isa ka semana man nila nga ginmonitor ang suspetsado tubtob sa natigayon nga makabakal ang poseur-buyer mismo sa subject.
Aminado naman ini nga nangin mabudlay ang operasyon bangod sa slump area ang lugar, sulodlun, madulom kag may pagalabayan pa nga taytay-taytay.
Samtang may nakahanda naman nga exit ang balay, gani sang magsulod ang mga operatibo, kaangay nga nakasulod na ang ulo ni Emolaga sa alagyan apang napunggan sang mga kapulisan.
Nakuha gikan diri ang tatlo ka elongated kag duha ka medium sachet sang suspected shabu kalakip na ang buybust item, isa ka coin purse kag P500 nga buybust money.
Ang suspected shabu ang ginabanta nagabug-at sang apat ka gramos kag may balor P27,200.
Suno kay Pendon, ang suspetsado ang sa nasambit nga lugar lang nagatransaksyon, kag pa-extra extra sa trabaho ang palangabuhian.
Ini ang nahibaluan man nga may live in ukon asawa, apang naga-isahanon lang ang suspetsado sang ginpatigayon ang operasyon.
Si Emolaga ang nakahunong na sa kustodiya sang Bacolod Police Station 2 kag natalana nga magpangatubang sang kaso nga Republic Act 9165 ukon Comprehensive Dangerous Drugs Act of 2002.
