Pilason ang 28 anyos nga lalaki matapos ginluthang sa Purok 6, Barangay Zone 14 A, sa ciudad sang Talisay kaina alas-3:50 sang kaagahon.
Ang biktima ang ginkilala nga si Jaylord Lamag, 28 anyos, residente sa nasambitan nga lugar.
Sa inisyal nga imbestigasyon sang Talisay City Police Station, nagatulog ang biktima kaupod sa iya live in partner sang sila ang mabugtawan bangod sa pagginu-al sang mga ido.
Gilayon naman ini nga gingwa ni Lamag, apang siya ang hinali nga ginluthang sang suspetsado gamit ang wala pa matumod nga calibre sang armas-luthang.
Ang edad 40 anyos nga suspetsado ang nakilal-an naman nga residente sa Barangay Zone 11, Talisay City.
Ini ang padayun pa sa karun nga ginalagas sang mga kapulisan, matapos makapalagyo kasunod sang ginbuhat nga krimen.
Ang biktima nga nakaangkon sang igo sang bala sa tangkugo ang gilayon naman nga gindala sa ospital para sa nagakaigo nga pagbulong.
