Arestado ang 28 anyos nga security guard matapos ini na aktohan nga nanaya sang armas-luthang sa isa ka Barangay Kagawad.
Ang suspetsado ang ginkilala nga si Nikki Flores, 28 anyos, nagatrabaho bilang security guard kag residente sang Barangay Roxas, banwa sang Moises Padilla.
Suno sa kapulisan sang Moises Padilla Municipal Police Station, sila nakabaton sang impormasyon nga may yara sang indibidwal nga naga-eskandalo kag nagapanutok sang armas-luthang.
Sa pagresponde sang kapulisan, ila na-aktohan nga may armas-luthang nga gina-uyatan ang suspetsado kasubong man nga nagatuga sang gamo.
Sang nakita sang suspetsado ang mga kapulisan nalagyo ini padulong sa ila balay, apang sa hingyo sang iya iloy, boluntaryo nga nagsurrender ang suspek kasubong man nga ginsurrender sini ang armas nga Caliber 38 revolver nga may fired cartridge kag isa ka live ammo nga wala sang serial number.
Sa karun yara na sa kustodiya sang Moises Padilla Municipal Police Station ang suspetsado samtang ang armas naman sini ang yara sa kustodiya sang Investigator on Case para sa proper disposition.
