Wala na sang kabuhi sang nasapwan ang 28 anyos nga volunteer teacher matapos maanod sa suba sa Brgy Gatuslao, banwa sang Candoni, Negros Occidental sang Sabado.
Ang biktima ang ginkilala nga si Regie Magbato, residente sang nasambit nga brgy kag volunteer teacher sa Calamunding Elementary School sa nasambit nga Barangay.
Suno kay Eric John Monserate, Local Disaster Risk Reduction Management Office (LDRRMO) head, alas- 10:00 sang gab-i sang nagplano ang pamilya ni Regie nga magpadulong sa isa ka selebrasyon apang dapat pa sila nga magtabok sa suba.
Sang Sabado sang hapon nahimo sang pamilya nga makatabok kag makapadulong sa selebrasyon.
Apang, alas- 10:00 sang gab-i naglisensya ang biktima nga magpauli una bangod nga wala sang upod ang iya iloy sa ila balay.
Sang nagsunod pauli ang pamilya, delikado na nga magtabok sa suba amo nga nagdesisyon ang mga ini nga sunod na lang nga adlaw nga magpauli kag nagpati nga nahimo nga makapauli sang biktima.
Pagkasunod nga adlaw, sang makaabot sa balay ang pamilya ila ginpamangkot ang iloy kun bala nakapauli si Regie kag didto na lamang nila nahibaluan nga nadula ini.
Alas- 11:00 sang udto sang Dominggo nasapwan ang bangkay ni Regie sa suba nga wala na sang kabuhi.
Ginapatihan sang pamilya nga naanod ang biktima bangod sa mabaskog nga daludo sang tubig.
