28 ka mga couples ang ginkasal sa atubang ni Mayor Alfredo Benitez sa Bacolod City Government Center kaina sang udto bilang kabahin sang mass wedding sang ciudad.
Sang damlag lang, gin-anunsyar sang alkalde nga indi madayon ang kasal sang 2,053 ka mga couples subong nga adlaw bangud ila pa ginafinalize ang mga detalye apang natigayon ang seremonya para sa 28 ka mga couples.
Isa sa mga ginkasal amu ang sea man nga si Jonathan Bia nga kagab-i lamang nagpauli nagikan sa Manila.
Suno kay Bia, nag-ayo ini kay Benitez nga indi lang pag-ipostpone ang ila kasal bangud nagatraining ini sa Manila kag posible nga tawgan na sang iya kumpanya sa masunod nga mga adlaw.
Suno diri, tuig 2013 sila nagkilalahay sang iya asawa kag may yara na sang duha ka mga kabataan.
Nagapasalamat ini sa alkalde sa kahigayunan nga madayon ang ila madugay na nga handum.
Samtang, ginakalipay naman ni Erwin Amador, residente sang Hacienda Carmen, Barangay Granada, nga natigayon sini nga napakaslan ang iya asawa nga 23 ka tuig na sini nga kaupod.
Suno kay Amador, 22-anyos na ang ila kamagulangan nga bata kag bag-o lang nila nadumduman nga magpakasal.
Isa man sa rason amu ang kapigaduhon sadto.
Suno sa iya, sang nag-anunsyar ang Bacolod City Government nga may patigayunon nga mass wedding, nagdesisyon na lamang ang mga ini nga makigbahin bangud ang importante, sila ang makasal.
Kaina, gin-anunsyar man ni Bacolod City Mayor Alfredo Benitez, nga sa Marso 11 natalana ang Mass Wedding sang 2023 ka mga couples.
