28 pa ka mga indibidwal nga nakigbahin sa mass testing sa Bacolod kag nagpositibo sa COVID-19 ang indi gihapon macontact sang Bacolod City Health Office tubtub subong.
Sa interview sang Bombo Radyo Bacolod kay Councilor Renecito Novero, chairman sang quarantine centers action team sang ciudad, nacontact na ang lima nagikan sa kabug-usan nga 33 ka mga persona nga COVID positive nga una na nga indi malab-ot.
Suno kay Novero, indi husto ang ginbutang sang 28 nga impormasyon sa Confidential Information Form ukon CIF kag kalabanan ang wala sang contact number.
Gintugyan na sang syudad kay Liga ng Barangay President Lady Gles Gonzales Pallen ang pagpangita bangud barangay-based man ang pagpatigayon sang duha ka adlaw nga mass testing.
Nagpanawagan man ini sa mga pumuluyo nga nakahibalo nga isa siya sa 28 ka mga tawo nga ginapangita nga magsubmit na sang kaugalingon sa isolation facility agud indi na magdamo pa ang malatnan magluwas sa pamilya kag mga kasilingan sini.
Indi man sini mahimo nga ipost ukon ipanawagan ang identity sang mga tawo nga ginapangita nila bangud sa Data Privacy Act kag mahimo nga manabat sang criminal liability sa tion nga himuon ini.
Suno kay Novero, pagatun-an pa nila kun paano ang proseso nga himuon agud malocate ang 28 ka mga tawo kag maisolate.
Gin-athag man sang pinuno sang Quarantine Centers Action Team (QCAT) nga okupado ang mga quarantine facilities sang nagpatigayon sang mass testing rason nga ginpaidalom ang mga ini sa home quarantine apang indi malipod nga may mga tawo nga wala sang disiplina.
