Ginkumpirmar sang pinuno sang Incident Management Team sang probinsya sang Negros Occidental nga nagpasugot na ang 28 sa 35 ka mga overseas Filipino workers (OFWs) nga dal-on sa EB Magalona Provincial Healing Center.
Madumduman nga indi magnubo 35 ka mga OFWs ang nagpaligad sang gab-i sa airport sang Martes bangud wala sila nagpasugot nga dal-on sa provincial healing center.
Sa interview sang Bombo Radyo Bacolod kay Jonathan Lobaton, ginpahayag sini nga gin-negosyar nila kahapon ang mga ini nga dal-on sa quarantine center para sa processing kag testing samtang nagapangita pa sang hotel nga available.
Suno kay Lobaton, 28 sa mga ini ang nagpasugot nga mag-upod apang may yara sa gihapon sang nagpabilin sa airport bangud wala nila naluyagan ang healing center.
Nagapangabay ang PITM commander sa mga OFWs nga intindihon lang kuntani anay ang sitwasyon bangud nga nagapangita pa sang bakante nga mga hotel.
Ginpasalig sini ang mga repatriated OFWs nga basta may yara sang hotel nga handa mag-cater, dal-on ang mga ini dayon didto.
Liwat naman nga ginpaathag ni Lobaton nga tanan man nga pagpanghanda ang ginahimo sang provincial government apang wala sang may naga-coordinate sa ila nga assigned agency sa pagpapauli sa mga returning Negrense OFWs gani wala sila kabalo kun pila ang maga-abot.
