280 ka mga modified open mufflers sang motorsiklo nga nakumpiskar sang Bacolod Police Station 5 ang ginpalapakan sa pison sa Barangay Granada, Bacolod City kahapon.
Ang operasyon ang ginpamunuan ni Police Major Joery Puerto, station commander sang Bacolod Police Station 5 kag Punong Barangay Alfredo Talimodao Jr. sang Barangay Granada.
Sa interview sang Bombo Radyo Bacolod kay Puerto, ang mga magahod nga tambutso ang ila nakumpisar humalin sang Enero tubtob Setyembre subong nga tuig.
Pahayag sang hepe nga ang mga open pipe nga tambutso ang nakumpiskar sa mga checkpoints nga ginapatigayon sang Bacolod Police Station 5.
Dugang pa sini nga ginpasanyog ang operasyon natuhoy sa mga modified open mufflers humalin sang Agosto, matapos nga madamo sang mga nagareklamo nga pumuluyo.
Paathag ni Puerto nga ginadumilian ang modified open mufflers santo sa provisions sang Republic Act 4136 ukon Land Transportation Code kasubong man sa City Ordinance No. 356 sa syudad sang Bacolod.
Ang mga madakpan ang gina-issuehan sang ticket samtang indi naman nila makuha ang mga motorsiklo tubtob nga indi ma-islan sang standard nga tambutso.
Suno kay Puerto, tuman na kadamo sang ila mga nakumpiskar kag wala na sang butangan gani sila ang nagpatigayon sang mass destruction agud nga mangin scrap.
Ini ang ginkuhaan man sang video agud makita sang publiko agud malikaw sa malisya, ilabi na nga iban sa mga modified open mufflers ang mahal ang presyo.
Dugang pa ni Puerto nga halos adlaw-adlaw sila ang may nagakakumpiskar kalakip na kahapon.
Panawagan sang hepe sa mga motorista nga indi na maggamit sang mga modified open mufflers bangod sila ang desedido nga magapanakop.
