Padayon pa nga ginabulong sa ospital ang isa ka 29-anyos nga lalaki nga ginbuno sa Sitio Batang, Barangay Talaban, Himamaylan City nagligad nga Setyembre 27 sang gab-i kun sa diin ang mga suspetsado ang nakuhaan pa sang iligal nga druga.
Ginkilala ang biktima kay Hansatol Magbato samtang ang mga suspetsado naman amo ang magpakaisa nga sanday Rogiel Testa, 21-anyos kag Bernie John Moles, 24-anyos kag lunsay mga residente sang amo nga barangay.
Sa interview sang Bombo Radyo Bacolod kay P/Lt. Alfred Mansoy, deputy chief of police sang Himamaylan City Police Station, ginpahayag sini nga magkaupod nga naga-inom-inom sanday Magbato kag Testa sang hinali lang nga wala ang mga ini nag-intindihanay nga nagresulta sa pagpamuno sang suspetsado gamit ang patalom sa nagkalain-lain nga bahin sang lawas sang biktima.
Nakaangkon ini sang pilas sa idalom nga bahin sang iya nawala nga ilok.
Matapos ang insidente, nagpadulong si Testa sa balay ni Moles agud magpangayo sang bulig nga magpalagyo sakay ang tricycle.
Suno kay Mansoy, samtang nagapadulong sa lugar ang mga pulis, may nagpahibalo sa ila nga nagpalagyo ang suspetsado sakay sa tricycle.
Na-intercept sang mga otoridad ang tricycle sa crossing Talaban sa amo nga ciudad kag didto positibo nga ginkilala sang saksi ang suspetsado.
Nagtuyo pa kuntani nga magpalagyo ang mga ini apang nadakpan naman sang mga kapulisan.
Sa pagrekisa sa duha, nakuhaan ang mga ini sang tag-isa ka sachet sang suspected shabu kag iban pa nga mga drug paraphernalia.
Suno kay Mansoy, napasaka na kahapon ang kaso nga pagpamuno samtang ginahulat pa ang resulta sang crime laboratory sa nakuha nga iligal nga druga agud ipasaka naman ang kaso nga pagbayolar sa RA 9165 ukon Comprehensive Dangerous Drugs Act of 2002 batok sa duha.
