Yara sa gihapon sa ospital ang 29 anyos nga lalaki nga biktima sang pagpamuno, kahapon, Marso 10, sa Purok 9, Barangay Aguisan, siyudad sang Himamaylan.
Ang biktima ang ginkilala nga si Jebs Gamusaran, 29 anyos samtang ang suspetsado naman amo si Wilson Cinco, 30 anyos, lunsay mga residente sang nasambit nga lugar.
Suno sa Himamaylan City Police Station, yara sa sulod sang ila puluy-an ang biktima kaupod ang pakaisa sini sang nakita nila ang isa ka persona sa sulod sang ila compound kag sang ila ini gintsekyar ila man nakilala ang suspetsado.
Apang sang ila ini ginkwestyon kun ano ang tuyo sini, gilayon na lang nga ginbuno sang suspetsado ang biktima sa li-og kag tu-o nga bahin sang abaga.
Gilayon man nga nalagyo ang suspetsado samtang ang biktima naman ang gindala sa Gov. Valeriano Gatuslao M Memorial Hospital para mahatagan sang nagakaigo nga pagbulong.
Padayon sa karun ang pursuit operation sang kapulisan sa nakapalagyo nga suspetsado.
