BACOLOD CITYWala na sang kabuhi ang 29-anyos nga lalaki sang ini ang nasapwan sa Purok 11 Arceo, Brgy. Alangilan ciudad sang Bacolod kaina sang aga.
Ginkilala ang biktima kay Tiker Delgado nga residente man sang nasambit nga lugar.
May igo sang bala ang biktima sa iya likod kag ulo sang ini nasapwan nga nagahapa na sa duta kag nagasuksok na lang sang underwear samtang nakabaklid ang iya nga kamot nga ginhigtan sang jacket.
Sa interview sang Bombo Radyo Bacolod sa iloy sang biktima nga si Alma, naglisensiya ini mga alas-5:30 kahapon sang hapon nga manguha sang paka sa linaw sa quarry site upod ang iya hinablos nga 14-anyos nga lalaki.
Nahibaluan nga isa ka quarry site ang natabuan sang krimen.
Suno sa iloy, naglisensiya ang iya bata nga indi na magpauli kagab-i matapos manguha sang paka bangud sa manokan na lamang niya nga ginabantayan siya matulog.
Gani ginkakibot nila nga nagpauli alas-7:00 kaina sang aga ang 14-anyos kag nagpanugid nga ginluthang ang iya tiyo samtang nagapanguha sila sang paka kagab-i apang indi niya kilala ang suspetsado.
Suno sa 14-anyos, nagpalagyo siya matapos ginluthang ang iya tiyo kag nagpalipas sang gab-i sa wayang kag kaina lang sang aga siya nagpauli.
Samtang suno sa iloy, kumpleto pa ang panapton sang iya bata sang ini ang naghalin sa ila balay kahapon apang gin-uba niya ang iya short pants sang nagpanguha na sang paka sa linaw bangud mabug-at ini kun mabasa.
Wala gid sang ideya ang iloy kun sin-o ang may kahimuan sang krimen bangud suno sa iya, wala man sang kontra ang iya bata kag wala man naga-intra sa iligal nga druga.
Sa karun nagapadayon ang imbestigasyon sang Bacolod Police Station 5 sa nasambit nga krimen.
