Gintransfer na sa Emilia J. Garcia Elementary School ang 29 ka mga pamilya nga gin-evacuate gikan sa tatlo ka purok sa Barangay Alijis, Bacolod City matapos nga amat-amat nga nagakatiphag ang kilid sang suba bangod sa sagunson nga pag-inulan.
Suno kay Julie Villaranda, katapo sa Ambulance Team sang Barangay Alijis, ang 29 ka mga pamilya ukon 127 ka indibidwal ang ginpang-evacuate gikan sa Purok Roadside 1, Roadside 2 kag San Jose.
Una naman ang mga ini nga gindala sa Barangay Hall apang bangod sa kadamo sang mga evacuees, ginpakamaayo kagab-i nga isaylo ang mga ini sa buluthuan.
Paathag ni Villaranda nga sa Emilia J. Garcia Elementary School, sarang ang mga evacuees nga mabahin-bahin sa nagkalainlain nga classroom agud ma-obserbar ang minimum health protocols, kasubong man mangin mahapos ang pagpalab-ot sang serbisyo kaangay sang galamitun kag pagkaon kun ipaanggid sa sitwasyon nila sa Barangay Hall nga nagaginutok.
Dugang pa sini nga mahapos ang tubig sa buluthuan kasubong man ang accessibility sa CR.
Suno diri, forced evacuation na ang ila nga ginpatigayon sa mga kapurokan sa palibot sang suba sa Barangay Alijis bangod tuman na ka delikado ang lugar.
Madumduman nga pila na ka adlaw nga nagasegi-segi ang pag-ulan nga nagtuga sa paghumok sang duta sa suba gani ini ang amat-amat nga nagakatiphag kag nagalapad.
Dugang pa ni Villaranda nga ginkinahanglan na sang Rescue Operating Group nga patigayunon ang forced evacuation bangod magluwas sa over saturated na ang duta sa lugar, ginalauman pa ang pagsulod sa Pilipinas sang isa pa ka bagyo nga may international name nga Malakas.
Santo sa monitoring may duha na ka balay kag mga kahoy ang na-upod sa pagkatiphag sang duta gani ginkurdon naman sang mga ini ang lugar agud nga wala na sang makasulod kag malikawan ang disgrasya.
Pasalig naman sang mga ini nga padayun ang pagkoordinar sang ila rescue operations samtang ang Barangay Council naman sa Alijis amo ang naga-amuma sa mga evacuees.
Sa pihak nga bahin, ginkumpirmar man ni Villaranda nga may isa ka babayi man nga nagbata nalang sa ila nga balay sa Barangay Alijis.
Paathag sini nga bangod sa kasakuon nila, ulihi na nakalab-ot sa ila ang impormasyon nga may-isa ka pumuluyo nga manugbata na gani sang ila napadulungan, nabun-ag na sini ang iya nga lapsag.
Gilayon man nila ini nga ginrekomendar nga madala sa ospital para sa dugang nga medication.
