Nag-abot na kaina sang aga sa Bacolod kag Negros Occidental ang mga Locally Stranded Individual (LSI) nga nakig-angot sa Bombo Radyo agud magpangayo sang bulig matapos nga makanselar ang biyahe kag nastranded sa Manila Pier bangud sa pagpatuman sang Modified Enhanced Community Quarantine (MECQ).
Madumduman nga nagpangayo sang bulig si Caren Oderio, residente sang Barangay Don Jorge Araneta, Bago City bangud sa indi maayo nga sitwasyon sang mga LSI sa Manila Pier 4 matapos nga nastranded halin sang Setyembre 9.
Kaina sang aga, nagdungka sa BREDCO Port ang 2Go trip kag gilayon sila nga ginpaidalom sa swab test antes ginsugat sang ila tagsa ka LGU.
Sa karun, yara na sila sa Bago City College kag nagahulat nga isaylo sa isolation facility bangud kinahanglan pa nga ikompirmar kun may yara sang bakante.
Nahibaluan nga si Oderio ang nag-abot sa pier sang Agusto 27 sa paglaom nga makasakay sa 2Go kag diri na ini nagtinir.
Setyembre 9 kuntani ang ila nga trip apang bangud ginpaidalom sa MECQ ang Bacolod sang Setyembre 8, ginsuspend man ang LSI trips.
Nagpasalamat ini sa mga opisyales sang gobyerno nga nagpamati sa ila panawagan kag sa Bombo Radyo nga nangin palaagyan.
Kabug-usan nga 294 ka mga LSIs ang nag-abot kaina sang udto sakay sa St. Leo the Great nga barko sang 2GO.
