Magatakop na subong nga adlaw ang tatlo ka adlaw nga 2nd Assembly Test para sa mga Philippine Navy reservist sa Negros Occidental.
Sa interview sang Bombo Radyo Bacolod kay Col. Hilario De Vera Jr., Commander sa Naval Reserve Center Western Visayas, ang aktibidad ang ginpatigayon sa John B. Lacson College Foundation sa Barangay Alijis, Bacolod City nga nag-umpisa sang Biyernes kag magatakop karun sa hapon.
Alas-4:00 sang Biyernes sang hapon, ginconsolidate ang mga nagregister nga reservists kag nagpatigayon sang orientation kun sa diin yara sa 150 tubtob 200 ang numero sang mga nagpartisipar.
Gintsekyar man ang ila blood pressure kag temperatura sa registration agud maseguro nga sila ang fit para sa tatlo ka adlaw nga aktibidad.
Ang Naval Reserve Center Western Visayas naman ang nagseguro sa paghatag sang matulugan kag pagkaon sang mga reservist gani mga personal nga kagamitan na lamang ang ginpadala sa ila.
Kahapon, nagpatigayon man sang series of activities kaangay sang lectures, quiz bees kag frolic sniping.
Nagpadulong man mismo sa ciudad sang bacolod si Major General Joseph Ferrous Cuison, Commander sa Naval Reserve Command kag siya ang gilayon man nga magabalik sa Manila matapos ang aktibidad.
Paathag ni De Vera nga duha ka beses sa kada tuig ginapatigayon ang Assembly Test para sa mga Philippine Navy reservist.
Ang una nga Assembly Test ang ginpatigayon sa probinsya sang Iloilo, samtang ang ikaduha ang ginfocus naman sa nagkalainlain nga reserved units sa Negros Occidental.
Ang objective sang aktibidad amo ang ma-organize sang maayo ang mga reserve units, ma-acount kag ma-assists ang ila responsiveness inkaso kinahanglan ang mobilization.
Pahanumdom ni De Vera, nga tuman ka importante ang mga Navy reservists bangod sila ang magapuno inkaso nga may kakulangan sa regular nga pwersa sang Hukbong Dagat.
