Ginpasiguro sang pinuno sang Department of Social Services and Development (DSSD) nga indi matapos ang subong nga semana kag mapanagtag na ang second batch sang foodpacks para sa mga apektado sa ginpatuman nga Modified Enhanced Community Quarantine (MECQ).
Sa interview sang Bombo Radyo Bacolod kay Pacita Tero, wala pa sila nakaumpisa sa pagpanagtag sang food packs bangud nagapadayon pa ang repacking.
Una na nga ginpahayag ni Tero nga Setyembre 21 suguran ang distribution sang ikaduha nga batch sang food packs.
Suno kay Tero, may yara sang 38, 000 ka mga foodpacks nga ginarepack sang DSSD.
Nakadepende man sa mga barangay officials ang pagpanagtag sang foodpacks.
Wala pa man ini nakahibalo kun madugangan pa ang foodpacks bangud nakadepende pa sa request sang Local Government Unit.
Ginseguro man sini nga wala na sang noodles nga malakip sa kalabanan nga foodpacks bangud may mga noodles nga maexpire subong nga Oktubre nga ginlakip pa sa pila ka mga foodpacks.
Ginpahayag man ni Tero nga nakadepende sa barangay chairman ang pagpatigayon sang mapping sang mga pigado nga mga pumuluyo agud nga masiguro nga pigado ang mahatagan sang foodpacks.
Samtang, ginpahayag man ni Tero nga madamo naman ang nakabaton nga left out beneficiaries sang Social Amelioration Program (SAP) cash grant sang tinalikdan nga semana nga nakabulig man sa mga naapektuhan sang ginpaidalom sa MECQ ang syudad.
