Nagdangat na sa indi magnubo 137 ka mga persona ang nagkalamatay sa Ukraine sa ikaduha nga adlaw sang paglunsyar sang Russia sang full-scale military attack nga naguba sa pila ka mga Ukrainian military facilities.
Sa video address ni President Volodymyr Zelenskyy, indi magnubo 137 ka mga persona ang nagkalamatay lakip na ang mga servicemen kag sibilyan samtang ginatos naman ang napilasan.
Suno sa intelligence report sang Estados Unidos, posible nga makuha na sang Russia ang capital city Kyiv sa masunod nga mga inadlaw.
Wala naman untat ang mga linupok kag pagtiniruhay nga nabatian sa Kyiv.
Nagpabilin sa Kyiv si Zelenskyy kag pila ka mga cabinet members kag ginpahayag nga indi nila pag-isungka ang demokrasya.
Nagschedule naman sang emergency meeting ang mga Western leaders kadungan sang pagpangayo sang bulig ni Zelenskyy sa iban nga pungsod.
Suno sa Border Guard sang Poland, kapin 29,000 ka mga persona ang naclear nga makasulod sa land border sang pungsod.
Nag-apelar si Zelenskyy sa mga pumuluyo nga magbato sa Russian troops kag nagpanagtag sang mga armas sa mga reservists.
Magahatag naman sang defensive equipment ang France sa Ukraine santo sa written speech ni French President Emmanuel Macron.
Wala naman ginpahayag sang speech kun ano nga sahi sang equipment ang igahatag sang pungsod.
Ginsulat ni Macron nga ang France ang magahatag sa Ukraine sang dugang nga budgetary assistance nga 300 million euros kag magahatag sang defensive material nga ila kinahanglan.
