Nagpanugyan ang second placer sa 2026 Librarians Computer-Based Licensure Examination sa mga wala nakapasar sa pasinawan nga indi madulaan sang paglaom.
Si Louise Angelika Pahilanga, tumandok sang Brgy. Estefania, Bacolod City ang nakakuha sang 92.40 percent rating sa board exam.
Siya ang naggraduate sa kurso nga Bachelor of Library and Information Science sa West Visayas State University sang June 2026 bilang Summa Cum Laude kag nakabaton sang award nga Most Outstanding Graduate in Academics.
Ang iya amay ang nagatrabaho sa isa ka cosmetics company samtang ang iya iloy ang nagabantay sang ila sari-sari store.
Bugtong lang nga bata si Pahilanga.
Sa interview sang Bombo Radyo, ginpahayag ni Pahilanga nga gusto niya mangin librarian bangud mahilig siya magbasa sang libro halin sang elementary.
Sang nagsulod na ini sa WVSU, ginhandom ni Pahilanga nga makasulod sa Top 10 kun magkuha na ini sang board exam.
Bangud sa mga academic awards nga iya nabaton, aminado si Pahilanga nga may pressure para sa iya bahin nga makapasar sa board exam apang may salig siya sa mga natun-an sa apat ka tuig nga pagtuon sa WVSU kag pagreview.
Nangin makahalawat-hawat ang paggwa sang resulta bangud na-delay ini sang pila ka oras.
Kaupod ang iya mga classmates sa balay sang ila professor sa Iloilo, nagsinggit sila sang nahibaluan nga 100 percent sang takers halin sa WVSU ang nakapasar kag daw indi ini makapati sang nakit-an ang iya ngalan sa Top 10.
Suno kay Pahilanga, ang pagpangibabaw niya sa board exam ang fulfillment sang iya handom kag pagpasalamat sa iya ginikanan kag tanan nga mga tawo nga nagsuporta sa iya.
Suno sa iya, kabahin lamang sang journey ang pagpasar sang board exam kag siya ang nagalaom nga makabawi sila sa tanan nga nagsuporta sa ila.
