Nangin madinalag-on ang pagpatigayon sang 2nd Quarter Nationwide Simultaneous Earthquake Drill (NSED) sa ciudad sang Bacolod, kahapon.
Madumduman nga ginpili sang Western Visayas Regional Disaster Risk Reduction and Management Council, paagi sa Office of the Civil Defense Region 6 ang ciudad sang Bacolod agud mangin pilot area sang NSED.
Sa interview sang Bombo Radyo kay Eunice Ciocon, local disaster risk reduction & management officer III, nagdangat sa masobra sa 200 ang numero sang participants nga nakigbahin sa NSED.
Suno diri, ang impact site ang ginalakipan sang Bacolod City Public Plaza, La Consolacion College, SM City Bacolod, kag Park Inn by Radisson Bacolod.
Kasubong man nga may yara pa gid sa Rizal Elementary School, Brgy Taculing kag Purok Violeta.
Suno kay Ciocon, sila nagpatigayon sang drill para ma-test ang kadasigon sang response team sa pagresponde sa insidente, kaangay na lamang sa pag-apply sang first aid, pag-evacuate, kag kun ano ka handa ang emergency response groups.
Samtang, ginpasalamatan naman sang Deputy Chief of Operation sang Bacolod DRRMO ang pagpatigayon sang NSED sa ciudad.
Suno kay Rodolfo Jamora, ang NSED ang ginapatigayon kada tuig apisar sa ano man nga tiyempo.
Dugang pa sini, kun ikumpara sa mga nakaligad, mas manami kag may improvement ang drill nga ginpatigayon kahapon.
Pahanumdom ni Jamora sa natapos lang nga 2nd Quarter Nationwide Simultaneous Earthquake Drill (NSED) amo nga ‘Practice until it becomes an Instinct’.
