BACOLOD CITY — Gindula sang Philippine Consulate ang kahangawa sang mga Pinoy nga yara sa Maldives kasunod sang deklarasyon sang state of emergency bangud sa political crisis.
Sa exclusive interview sang Bombo Radyo Bacolod, ginpahayag ni Philippine Honorary Consul Abdulla Salih nga ‘business as usual’ ang sitwasyon karun sa capital city nga Male kag sa bug-os nga Asian nation.
Bukas man ang talatapan sang gobyerno kag mga eskwelahan kag wala man sang mga kalakasan nga nagaluntad kasunod sang deklarasyon ni President Abdulla Yameen Abdul Gayoom.
Wala man sang curfew kag kalmado ang mga dalan sa bug-os nga Maldives gani wala sang dapat nga kahadlukan ang mga Pinoy.
Sa datos sang Philippine Consulate, kapin tres mil ang mga overseas Filipino workers sa nasambit nga pungsod kag kadamuan sa mga ini ang nagatrabaho sa tourism industry.
Ginadayaw sang mga opisyal ang mga Pinoy bangud nga maayo ang trak record sang mga ini.
Ginpasiguro naman ni Salih nga nakahanda ang konsulada nga magbulig sa mga nagakinahanglan sang bulig.
Magapakig-angot lamang sa iya talatapan ang sin-o man nga nagakinahanglan sang bulig bangud nga nakahanda ini nga magbulig sa mga OFWs.
